Mae'n debyg eich bod yn teimlo'n nerfus ac yn gyffrous am eich diwrnod cyntaf yn y coleg. Peidiwch â phoeni, mae pawb arall
yn teimlo’r un fath hefyd! Bydd digon o staff cyfeillgar a llysgenhadon myfyrwyr wrth law i'ch helpu i ddod o hyd i'ch ffordd o amgylch y coleg.
Anfonir gwybodaeth atoch chi’n dweud wrthych ble i fynd ar eich diwrnod cyntaf. Os nad ydych wedi derbyn yr wybodaeth cyn dechrau'r tymor, anfonwch e-bost at: studentsupport@nptcgroup.ac.uk neu ffoniwch ni ar (03308) 188100
Mae’r dyddiau cyntaf yn cael eu treulio yn eich croesawu i'r coleg. Byddwch yn cael cwrdd â'ch darlithwyr a'ch cydfyfyrwyr, mynd ar daith o amgylch y coleg, a darganfod y pethau pwysig, fel sut i gysylltu â'r wi-fi a ble i gael coffi.
Os oes gennych unrhyw gwestiynau tra byddwch yn y coleg, siaradwch â'ch tiwtor, neu gofynnwch yn y Dderbynfa, y Parth Myfyrwyr neu'r Llyfrgell.
Mae gwefan y coleg yn cynnwys gwybodaeth am deithio i'r coleg, gan gynnwys y llwybrau bws i'r gwahanol gampysau a sut i brynu'ch tocyn bws.
Gwefan Grŵp NPTC: Cyllid a Chludiant Myfyrwyr
Os ydych yn derbyn cymorth ariannol fel LCA, GDLlC neu’r gronfa caledi, byddwch yn cael cludiant am ddim i’r coleg. Am ragor o wybodaeth cysylltwch â studentsupport@nptcgroup.ac.uk
Mae lleoedd parcio cyfyngedig ar gael ar bob campws yn rhad ac am ddim, ac eithrio yn Y Gaer yn Aberhonddu.
Sylwer: Rhaid i bob gyrrwr gydymffurfio â’r cyfyngiadau gyrru a pharcio sydd ar waith o fewn/o gwmpas y campysau. Nid yw Grŵp Colegau NPTC yn derbyn cyfrifoldeb am gerbydau na’u cynnwys. Mae pob cerbyd yn cael ei barcio ar risg y perchennog.
Gelwir y rhwydwaith Wi-Fi yng Ngrŵp NPTC yn eduroam, ac mae ar gael ym mhob un o'n colegau. Unwaith y byddwch wedi cofrestru, byddwch yn cysylltu'n awtomatig â'r Wi-Fi pryd bynnag y byddwch yn ymweld ag un o'n safleoedd.
Dilynwch y cyfarwyddiadau yn y canllaw isod ar gyfer sefydlu'ch dyfais i gysylltu ag eduroam. Bydd angen eich cyfeiriad e-bost coleg a chyfrinair arnoch.
Os oes angen unrhyw gymorth arnoch i gysylltu ag eduroam, cysylltwch â Gwasanaethau TG: itservices@nptcgroup.ac.uk
Mae amrywiaeth eang o brydau bwyd, byrbrydau a diodydd ar gael yn y Coleg o ddydd Llun i ddydd Gwener. Mae'r rhain ar gael yn y Ffreutur ar bob safle. Mae opsiynau llysieuol ar gael. Gwnewch yn siŵr eich bod yn gofyn i staff y ffreutur os oes gennych unrhyw alergeddau.
Gellir prynu bwyd gan ddefnyddio arian parod neu gerdyn. Gallwch hefyd ddod â'ch cinio eich hun neu brynu bwyd oddi ar y safle.
Bydd rhai myfyrwyr yn gymwys i dderbyn prydau am ddim, ond ni fydd hyn yn ei le erbyn yr wythnos gyntaf, felly gwnewch yn siŵr eich bod yn dod â chinio neu'n gallu prynu cinio i ddechrau. Bydd angen i chi ddangos eich cerdyn myfyriwr i dderbyn eich ciniawau am ddim.
Mae gan y coleg bolisi dim ysmygu ar gyfer holl adeiladau a thiroedd NPTC. Mae hyn yn cynnwys sigaréts electronig ac anwedd.
Yn gyffredinol nid oes gwisg na chod gwisg ar gyfer mynychu'r coleg, fodd bynnag disgwylir i chi wisgo mewn ffordd nad yw'n tramgwyddo eraill.
Mae angen i chi wisgo dillad priodol ar gyfer eich cwrs. Gall hyn fod yn ofyniad iechyd a diogelwch ar gyfer rhai cyrsiau, a bydd eich tiwtor yn rhoi mwy o wybodaeth i chi am yr hyn a ddisgwylir.
Efallai y bydd rhai cyrsiau fel Gwallt a Harddwch hefyd yn gofyn am brynu gwisg unffurf, a bydd eich tiwtoriaid yn rhoi gwybodaeth i chi am hyn.